في اول شبابي اكتشفت اخطر سر في حياتي

مش شرط يكون ابويا !!!
طيب اعمل ايه علشان تصدقني 
العلم مش بيكدب ولا بيجامل ١١٢ فصيلتي وفصيلته مستحيل يكونوا فصيلة أب وابنه !!!
يا بني وأنت عرفت فصيلته منين 
من بطاقته .
يا بني أيام أبوك لما عمل البطاقة كان لسه العلم مش متقدم زي دلوقتي يمكن فصيلته اتكتبت في البطاقة غلط 
لأخر مرة يا امي قوليلي الحقيقة وأنا هتقبلها بدل ما أعيش عمري كله شاكك في نسبي !!
يا ابني أبوك هو منير عيش مرتاح ومتشكش في نسبك انا مش هضحك عليك .
أنتهي الكلام بيني وبينها وهي مصممة أني ابن منير لكن فضل الشك جوايا !! 
لما شوفت بطاقته قبل ما أكلمها كنت متأكد أن منير مش ابويا لكن كلامها زعزع اليقبن جوايا ورجعه لمرحلة الشك . لكن نسبة الشك عندي مش هتزيد عن احتمال ضعيف لا يتعدي ١ أنما الاحتمال الاكبر اني فعلا مش ابن منير !!
مقدرتش أعيش معاها في نفس البيت بعد كده وأنا جوايا الشك ده ومش عارف ارتاح واوصل ليقين !!
سيبت البيت وأخدت شقة وعيشت فيها لوحدي وسط رفضها وتعجب كل المحيطين بنا !!
وفضل الكلام ده ببني وببنها مفيش حد عرف به تاني .
ودلوقتي مر ٩ سنين وانا لسه عايش لوحدي ورافض أني اتجوز او حتي احب وارتبط بأي بنت بعد صدمة عمري اللي ډمرت حياتي وجعلت حياتي كابوس كبير !!
السر ده مفيش حد في الكون يعرفه غيري وغير امي لكنه دمرني نفسيا وطول ٩ سنين وأنا شايله جوايا مش قادر أخرجه لحد .
و أنا بتابع القصص شوفت الفقرة الجديدة دي اللي باسم الاعترافات فحبيت أرسلهالكم يمكن اجد عن حد منكم حل او يمكن أرتاح ولو بنسبة بسيطة .
أنتهي .