رواية ابن أمي وأبويا ( حصرية ) للكاتب عادل عبد الله
رغم ان ده فيه تعدي علي الاصول لأن المفروض يستني اخواته البنات لما يتجوزوا لكن كانت الصدمة لما عرفت انه هيخطب عبير جارتنا حب عمري اللي بحبها من زمان !!!!!
صحيح انا عمري ما قولتلها اني بحبها لكن كانت كل نظراتي لها وتصرفاتي معاها كانت بتتكلم بدل من لساني .
فكرت كتير اقول لأسامة ولا مش اقوله اني بحبها علشان يبعد عنها .
طيب ازاي هشوفها كل يوم قدامي و هي مرات اخويا
كان لازم اقوله وفعلا كلمت أسامة وقولتله بلاش عبير يا اسامة .
قالي ليه بلاش عبير دي بنت حلوة ومؤدبة !!
كلمته بصراحة وقولتله أني بحبها أسامة وقف يفكر وبعدين قالي بص يا احمد أنا بحب عبير وهتجوزها واعتقد أنها لما تبفي مرات اخوك هتحبها زي اختك بالظبط .
قالي انت حر !! انت يا احمد اخترت التعليم ولسه قدامك كتير ومش هتتجوز دلوقتي انما انا اختصرت الطريق من البداية واشتغلت وانت مش هتاخد كل حاجة يا احمد !!
كلامه عصبني اوي و خرجني عن شعوري وقولتله بقي انا اللي عاوز اخد كل حاجة يا أسامة ده انت واخد حب وحنية ابوك وامك من زمان وواخد فلوسهم ورغم انك بتشتغل لكن بردو بتاخد فلوس من امك في الوقت اللي انا كنت محتاج انهم يقفوا جنبي في تعليمي محدش فيهم كان بيديني حاجة !! رغم ان فلوسهم دي اللي انت بتاخدها ومتحرمة عليا من شقايا وتعبي مع ابوك في الارض !!
اوعي تنسي يا أسامة أني اعتمدت علي نفسي رغم أني انا أولي بأنهم يساعدوني علشان أكمل تعليمي . ومش من دلوقتي يا اسامة ده من زمان امك كانت بتفضلك عليا في كل حاجة في الاكل وفي اللبس وفي المصروف . حتي دلوقتي عاوزة تجوزك قبل اخواتك البنات !! مش مكسوف علي دمك مش الأصول انك تستني اخواتك البنات لما يتجوزوا !!
قولتله مش حقد . وانا هحقد عليك ليه اللي بيحقد ده بيحقد علي حد احسن منه !! وحتي لو انا شايفك احسن مني مش هحقد عليك لأنك اخويا .بالعكس هفرح واتباهي بيك قدام الناس .
رد أسامة وقالي لأ يا احمد انت بتحقد عليا وحقدك باين في عينيك وهقولك حاجة هتفرحك اوي انا هتجوز عبير يا ابن امي وابويا !!
الحلقة الثالثة
رد أسامة وقالي لأ يا احمد انت بتحقد عليا وحقدك باين في عينيك وهقولك حاجة هتفرحك اوي انا هتجوز عبير يا ابن امي وابويا !!
قولتله انا عمري ما حقدت عليك انت يا اسامة اللي بتحسدني علشان انا اتعلمت وانت لأ . و عينك وحسدك ليا كان سبب اني اعيد سنة في الكلية .
لأ ده مش حسدي ده فشلك انت لما انت عارف انك مش قد الهندسة بتدخلها ليه !!
اه اشتغلت بره وسبت ارض ابوك وجاي دلوقتي تقول ان الفلوس اللي مع ابوك وامك من شغلك معاه في الارض !!
انا اشتغلت مع ابوك في الارض اكتر من عشر سنين وكنت لازم اشتغل بره علشان اجيب مصاريف الكلية ولا كنت هعمل ايه وهو مش بيديني فلوس وانت كنت فين يا اسامة عمرك ما ساعدت ابوك في الفلاحة .
وكمان كنت عاوز تاخد فلوس من ابوك نظير مساعدتك له في الارض
اومال هصرف علي تعليمي منين
بص يا ابن امي وابويا انت انسان معقد وكلك عقد ابعد بعيد عني بعقدك دي وانا زي ما قولتلك هتجوز عبير .
خلص كلامي مع اسامة وهو مصمم انه يتجوز عبير وفعلا راح مع ابويا
