قصة عمرو وصديقه الجني

 اوعى تتحرك من مكانك 
اوعى تخرج برا المدرسة لحد ما اجيلك 
تقعد في فصلك.. تحل الواجب لحد ما اوصل 
وغيرها من النصايح اللي ماما كانت لازم تقولها لي كل يوم على مدار سنيني الدراسية لحد ما حفظتهم صم في الاول.. كنت بسمع الكلام بشكل مفيهوش نقاش ماما قالت اعمل دا.. يبقى الموضوع منتهي ولازم اعمله لحد ما كريم ظهر في حياتي..

كريم ظروفه هو كمان كانت شبه ظروفي والده ووالدته بيشتغلوا زي بابا وماما والده بيتاخر في الشغل زي بابا ووالدته هي اللي بتيجي تاخده من المدرسة بس للاسف.. كانت بتيجي بعد حوالي نص ساعة من ميعاد المرواح بس على الاقل دي نص ساعة انا ماما بتسيبني ساعة تقريبا قبل ما تيجي تاخدني..
طلبت منهم مرة يشتركوا لي في باص المدرسة عشان يوصلني البيت بدل ما بقعد في المدرسة مع كريم لوحدنا بعد المرواح او حتى ساعات بقعد لوحدي لو كريم مامته جت خدته بدري او غاب اصلا بس هي قالتلي مينفعش.. لان بمنتهى البساطة هي وبابا في الشغل فانا حتى لو الباص روحني هعمل ايه
حاولت اقنعهم ان قعدتي على سلم البيت ارحم مېت مرة من قعدتي في الفصل او في الحوش والمدرسة فاضية خصوصا يعني ان مدرستنا اساسا كانت مبني قديم واتحول لمدرسة موخرا بس هما عارفين ان باب الاسانسير بايظ وكانوا خايفين العب فيه او اقع من فوق..
وعلى الرغم من الملل والزهق اللي كنت بحس بيهم انا وكريم الا اني يعني كنت قادر استحمل خصوصا ان كريم كان ساعات بيجيب كان بيبسي قديم ويطبقها ونلعب بيها كانها كورة وماما كانت دايما بتزعق وبتقولي اني كدا بقطع الجزمة بتاعتي بس عادي بقي.. المهم اننا بنتسلى لحد ما ييجوا!
في يوم لاحظت ان كريم زهقان سالته مالك قالي انه زهق من المدرسة ومن لعب الكورة سالته لو يجب نقعد نذاكر او نحل الواجب سوا لحد ما ماما او مامته ييجوا قالي لا سالته امال يحب نعمل ايه
وساعتها قالي الجملة اللي غيرت حياتي كلها!
الواد بهاء اللي في ٥٤ بيقولي ان الدور التالت مقفول عشان مسكون! 
سالته بمنتهى الغباء مسكون ازاي فيه ناس ساكنة فيه يعني 
ضحك على سذاجتي وهو بيقول هو مسكون اه بس مش ناس يا صاحبي! 
وطبعا كان لازم اساله يعني ايه 
قعد على الدكة اللي ادامي وهو بيقول انت عارف ان المدرسة دي اصلا كانت فيلا بيقولوا بقى الفيلا دي بتاعة واحد خواجة.. اجنبي يعني وكان جاي هنا هربان من بلدهم يا صاحبي بيقولوا كمان انه كان قاټل كذا حد في بلدهم وجاي هنا هربان من البوليس بس ارواح الناس اللي قټلهم جت هنا اتحدت مع بعض